අඹු සැමියන් උනුන් කෙරේ ගෞරවයකින් තොරව ජීවත්වීමට මුල පුරන්නේ කෙසේද? එය කෙනෙකුගේ පැවැත්මේ වරදක්ද? දෙමාපියන්ගෙන් උරුම ජීවිතයද? අධ්යාපනයෙන් පිබිදීම - මිල මුදල් හරි හම්බ කිරීම හෝ වස්තුව උරුම කරගැනීම - කායිකාස්වාදය අත්කරගැනීම සැබැවින් ම ශක්තිමත් ජීවිතයක පදනමට වැදගත් වන්නේ කවරාකාරයෙන්ද?
උසට වැඩුණු කොළ හැළුණු ගස දකින විට සිතෙන්නේ අහසට අත් ඔසවා වැස්ස අයදින බව යයි අපි සිතන්නෙමු. එහෙත් කොළ හැලී ගිය ද මහ පොළොව තුළ මුල් දරා සිටින තුරා ගස මියැදෙන්නේ නැත. එහෙත් නිසි කල ජලය නොලැබෙන - පොහොරක් නොලැබෙන හිරු එළිය අවැසි සේ නොලැබෙන වටිනා පැලයක් වුව අකාලයේ මියැදෙයි.
අඹු සැමියන් සරළ සමාන්තර රේල් පීලී දෙකක් සේ ඉදිරියට ඇදුණද; එක වහලක් යට ජීවත් වුවද උනුන් කෙරේ ගෞරවනීය බැඳීමක් නැත්නම් ජීවිතය වෙහෙසකරය, පීඩාකාරීය, ඉමහත් සතුටින් ජීවිතයක් ආරම්භ කර කාලයක් සතුටින් කාලය ගෙවා උනුන් කෙරේ තරහින් ජීවත් වන්නේ ඇයි?
ගසක් අතුපතර විහිදී හොඳින් වැඩෙයි. ඉක්බිතිව කොළ හැලී පල නොදරා ජීවයෙන් තොර බවක් පල කරන්නේ ගස වියපත් වූ නිසාමද ? මේ පොත ගෞරවනීය බැඳීම් වලින් තොරවීමෙන් වෙහෙසට පත් වූවන් ජීවිතය අත් නොහැර අභියෝගවලට මුහුණ දුන් හැටි විස්තර කරයි.